ടൈം മെഷീൻ

 അല്ലാഹുവിൻ്റെ ഖജനാവിൽ മാത്രമാണ് സമയം ഉള്ളത്. അനന്തമായ സമയം."

ഇത്  പറഞ്ഞത് വൈക്കം മുഹമ്മദ് ബഷീറാണ് .

സമയത്തെക്കുറിച്ചുള്ള മനുഷ്യൻ്റെ പരിമിതിയെയും, ദൈവത്തിൻ്റെ അനന്തമായ അധികാരത്തെയും സൂചിപ്പിക്കുന്ന അദ്ദേഹത്തിൻ്റെ തത്വചിന്താപരമായ ചിന്തകളിലൊന്നാണിത്.

സമയത്തിനെ പറ്റി വ്യാകുലപ്പെടാത്തവർ ഉണ്ടാവില്ലെന്ന് തോന്നുന്നു. 

എത്ര വേഗമാണ് വർഷങ്ങൾ കടന്നു പോവുന്നത്.

ഉമ്മറ കോലായിൽ തുലാമഴ നോക്കിയിരിക്കുമ്പോൾ മനസ്സിൽ ഓർമ്മപ്പെയ്ത്താണ് . അന്നത്തെ കാലം . രാവിലെ എഴുന്നേറ്റ് കിണറ്റിൽ നിന്ന് കപ്പിയും കയറും ഉപയോഗിച്ച് വെള്ളം കോരി കുളിച്ചതും . ബക്കറ്റിൽ വെള്ളം നിറച്ച് വീടിന് അകലെയുള്ള ടോയ്ലെറ്റിൽ പോയതും . അന്ന് എല്ലാത്തിനും സമയമുണ്ടായിരുന്നു. ഇന്ന് കുളിക്കാൻ ഷവറും മറ്റ് അത്യാധുനിക സൗകര്യമുള്ള വീട്ടിനകത്തെ ടോയ്ലെറ്റ് അലക്കാനും ഉണക്കാനും ഫുളി ഓട്ടോ മാറ്റിക്ക് വാഷിങ് മെഷിൻ , പൊടിക്കാനും അരക്കാനും യന്ത്രങ്ങൾ ഇവയൊന്നും ഉണ്ടായിട്ടു പോലും സമയം ഒന്നിനും തികയുന്നില്ല.

ശാസ്ത്രം സമയ സമ്പാദകോപാധികൾ ധാരാളം നിർമ്മിച്ചെങ്കിലും നമുക്കൊന്നിനും ഇപ്പോ സമയമില്ല...

റഫീഖ് അഹമ്മദിൻ്റെ ഭാഷയിൽ പറഞ്ഞാൽ സമയത്തെ കുറിച്ച് ചിന്തിച്ചാൽ ഒരു പക്ഷേ ശാസ്ത്രീയമായ ഒരാത്മീയതയിൽ നമ്മളെത്തിച്ചേരും..

എണ്ണിയെണ്ണി കുറയുന്നിതായുസ്സും-മണ്ടിമണ്ടി കരേറുന്നു മോഹവും" - പൂന്താനം

ടൈം മെഷീൻ - എച്ച്. ജി. വെൽസ് 1895-ൽ എഴുതിയ പ്രശസ്തമായ ഒരു ശാസ്ത്ര നോവലാണ് 'ദി ടൈം മെഷീൻ'.